◎ 陳金順
這站公視當咧放送的《燦爛時光》，是一部罕有處理二二八事變佮美麗島事件的電視劇。設使你過去對台灣歷史無夠了解，設使你過去認為家己是中國人，觀看這齣戲了後，你心內的信念定著會閣較接近台灣價值。
四年一擺投票選舉總統佮立委的日子漸漸逼近。事實上，總統選舉的結果你知我知，無需要閣佇遮加了喙瀾。區域立委選票欲頓予啥，逐家用理性去判斷，針對各選區落去選擇理想的人才。
本人較致意的是立委選舉裡的「政黨票」。這屆選舉攏總有十八個大大細細的政黨欲爭取只有卅四席的政黨票。我相信，相信台灣價值的你，絕對袂共選票投予中國意識彼幾個黨。
我干焦向望台灣價值的政黨佇不分區會當取得閣較濟席。我無欲教逐家按怎配票，嘛強烈反對台派政黨互相攻擊。設使你猶咧躊躇，毋知欲共政黨票投予啥？下底是我的建議：強烈主張台灣獨立投予「自由台灣黨」、反對事事項項偏向中國投予「台灣團結聯盟」、關顧弱勢佮環保投予「綠黨社會民主黨聯盟」、欲開創新政治予少年人機會投「時代力量」、欲成全國會單獨過半投予「民主進步黨」。
總講一句，投下你心內彼票台灣價值，反轉數十年來予外來政權統治的宿命。特別是會當集體改變台灣運命的大學生佮少年人，定著愛會記得回鄉投票。
（作者為台南市民）
編輯精選
自由評論網粉絲團