海翁出航
■ 李勤岸
昨—日(tsoh--ji̍t;前天)報紙ê 頭條新聞「成功高中教官誘姦國一女生」。原來教官這款國民黨威權時代ê產物iáu-koh (仍然)tī leh。Tī這個真濟人開始懷念國民黨時代ê 時陣,這個新聞真顯目 (hiáⁿ-ba̍k),tī hia提醒咱。
單純、幼稚ê 台灣人民參 (tsham,和)這個未滿十四歲ê 查某囡仔真相像,hō͘人拐kah 戇戇旋,甘願hō͘人強,甘願beh koh轉去hit個威權ê舊時代。
Tsûn—年 (前年)七月教育部軍訓處處長宋文利用教官調動ê 機會收紅包。Hit 陣大家真受氣, 講教育部應該廢除軍訓處,教官應該退出校園ah。
一九八六年六月有一位中山大學講師,因為教官派學生kā監視,講伊上課批評政府,被國民黨進駐校園ê 情治單位「人二室」迫害, 致使遭受惡意解聘。Hit 陣大家mā 真受氣, 要求「人二室」kap 「安維秘書」ài 廢除,教官ài 退出校園。後來大學「人二室」廢ah, 中學「安維秘書」撤ah, 但是大學kap中學ê 軍訓教官猶原老神在在。
聽講教官後來tī 校園ê 職務有略仔 (lio̍h-á,稍微)調整,軍訓課程ê 名稱mā有略仔修改;聽講無koh teh做爪耙仔ê 工課ah;聽講校園內底救難工作攏是教官走第一,學生真濟困難攏是教官teh 鬥相仝,甚至拍麻雀(打麻將)hō͘ 警察掠 (lia̍h,抓) 著,mā是教官去保出來。講kah 那像校園無教官bē使得ah。教官參學生關係變kah足好ê。 Taⁿ tsit-má (現在) 已經siuⁿ過頭好 ah lah。
報紙講koh6冬教官制度就會廢除。是按怎ài koh 等6冬?咱猶有法度等hiah-ni̍h久?教官繼續留tī 校園,台灣ê 大學beh 有一間進入世界百大是無可能ê 代誌,教育部1年120億是lòng lòng (擲) hin 湯裡niâ (而已)。
(作者為詩人、世界台灣母語聯盟總召集人,用聽ê 請上網 http://khinhuann.taibun.tw/ )
編輯精選