■ 李勤岸
由文建會主辦，台灣國際研究學會承辦ê「國家認同之文化論述學術研討會」，連續兩工（6/10~11），tī國家圖書館舉行。總共發表三十篇論文，tī文化類型上有語言、文學、電影、音樂、美術、媒體、宗教、運動、教育；借鏡ê國家有英國、美國、加拿大、中國、法國、日本、澳大利亞、紐西蘭；族群包括原住民、「外省族群」、客家、Holo、外籍新娘。深度、闊度攏有夠，算是相當豐沛（phong-phài）。
前文建會主委陳其南教授講起這場研討會ê起源，伊tī任內ê時看著美國ê文化學家杭廷頓出版《Who are we？》，引起美國人熱烈探討in ê國家認同，伊mā希望咱會tàng ùi文化ê角度來討論咱ê國家認同，然後mā來出一本《咱是啥人？》可惜一直tshūe無人願意來khō ，來辦，等到tshūe著施正鋒教授願意來擔，今仔日才有法度辦起來。Taⁿ（現在）伊已經落任冬外lah。
這真諷刺！一個國家部會竟然連辦一場國家認同文化論述研討會ê才調（tsâi-tiāu，能力）都無！
文建會kám m 是真早tioh teh講beh提升做文化部？為何到taⁿ無聲無說？
國家圖書館內底大家當teh認真探討台灣人文化層次ê國家認同，當teh做建設性工課（khang-khùe，工作）ê時，外口無偌 （jūa，多）遠，有一陣人tī hia用破害性ê語言tshiàⁿ聲，beh罷免總統，beh hō 這個國家陷入動亂。
這真諷刺！離無幾步遠，咱國家ê認同tioh無相像ah！台灣tsiah-nih小，竟然內底有tshiah濟個國家！台灣上大ê問題可能m 是無國家，顛倒可能是有siuⁿ濟個國家。咱若繼續輕視國家認同ê文化思考，咱ê國家認同攏是浮浮無根ê水萍（tsúi-phiô，浮萍）。就像咱tsit-má按呢。
（作者為詩人、世界台灣母語聯盟總召集人，用聽ê請上網︰http://khinhuann.taibun.tw/ ）
編輯精選
自由評論網粉絲團