手寫母語

■ 高英男

猶（iu）閣beh（欲）選舉啊！此擺是選里長，年底換到選市長kap市議員。因為競爭，選情強強滾！Chhun（剩）無幾天，此陣仔大家攏開始la（攪）起來啊！宣傳車沿街仔路放送、拜託；炮仔聲pin-piang（迸砰）叫，khan-pan（看板）、旗仔是花哩漉貓。當然，閣卡（koh-khah）按怎無閒，嘛要請廚子師（tou-chi-sai）來辦一攤，ka大家thun（填）一下仔地基、慰勞一下。阿若無，尚起碼嘛要辦一場茶會，交陪、聯誼。這是一般看會著ê選舉步數。

連續個外月來，逐（tak）天透早beh（欲）載囝仔去讀冊ê時，攏會看著一位里長候選人一ê人徛（khia）佇路口，身軀邊插二支旗仔，ka過路ê民眾、車輛拜票。無車陣，無人海。人若經過，伊著九十度行禮；車若經過，伊著舉（giah）雙手拜託，喬找（chhiau-chhoe）支持。雄雄（忽然間）一ê人徛惦路口推銷家己，大家攏真好奇。呣閣，訴求簡單、做法環保，koh祙造成大家ê無方便kap攪吵。兼採大家致意ê，是平常時有kut（骨）力teh為民服務--無！等到beh（欲）選啊，才佇遐（hia）打鑼long鼓，喝到大細聲，Who care？

請繼續往下閱讀...

台灣歸年thang（暢）天攏teh選舉，呣知這是人民ê福利？抑是已經變成社會ê困擾？是真正民主，互人民做頭家，抑是互一寡政客利用來成做爭權奪利ê舞台kap門路leh？無定著咱會有無共款ê曉悟。

（作者為台語文字工作者）

不用抽 不用搶 現在用APP看新聞 保證天天中獎　 點我下載APP　 按我看活動辦法