■ 林仙龍
制度若像一本使用手冊，不管是一台電氣用品，抑是一架（chiah4）重機械，只要遵照使用手冊的說明，操作起來自然就有應有的效果。
不管是一個家庭，一間學校，一間公司，一個黨，抑是一個政府，一個國家，也攏有它的制度，遵守制度是上要緊的代誌，只要組織內的成員，不管他是基層，抑是領導者，攏必須要遵守制度，一切攏佇制度內運作，焉爾一切自然就會平穩，就會進步，就會保障多數人的福利。
此遍年底的高雄市長選舉，民進黨黨內的初選，舞一下遂舞傞傞（bu7-sa3-sa3：亂七八糟），甚至講欲抃破（phah4-phoa3：打破）制度，準備更做一遍初選的登記，此下（siaN1），三位民進黨的女性精英頭殼遂抱（mooh4）咧燒，莫怪民進黨大老吳乃仁會無細膩（bo5-se3-ji7：不客氣）開嘴講：「堅持制度比選舉的輸贏更加重要。」
掌權的人不遵守制度，是權力心作怪，此點咱攏知，此幾冬來台灣的亂象，就是焉爾造成的，權力予人腐化，絕對的權力予人絕對的腐化，這並無稀奇。但是盤算（phah4-sng3）佇二○○八年爭取總統大位的民進黨二大天王，今就公然將制度置之度外，實在予人誠懷疑，敢講焉爾對尹進軍總統府是聰明的做法？敢講尹不驚人講「猶未豪額（ho2-giah8：富有），就驚著賊偷（tioh8-chhat8-thau1：遭小偷）」。 （作者為台語文字工作者）
編輯精選
自由評論網粉絲團