〈鑼聲若響〉
■ 林仙龍
高雄柴山的猴猻仔(1)誠大膽,光天白日走落來山下,搶果子擔的果子,這叫做搶食。
2003年,陳水扁總統為著頭目津貼,去花蓮地檢署出庭,他提早落車,安全人員驚一下半小死(2),媒體拚命報導,這叫做搶鏡頭。
今立委李全教咬第一家庭收SOGO的禮券,三日兩日上新聞,變成是近來上熱門的新聞人物之一,這叫做搶新聞。
為著疼囝,老爸三更暝半去補習班門口排隊,替愛子報名補習,佔較好的位,這叫做搶位。
開正透早(3),民眾去官田陳水扁總統的舊茨排隊領紅包,領一個紅,討一個喜,這叫做搶好彩頭。
若焉爾看來,搶,有時是好事,有時是黴事(4)。今年台北市、高雄市欲選市長,咱看到一大堆人表態出馬競選,這叫做搶出頭天,不知此種「搶出頭天」是好事?抑或是黴事?
人講「做官一時,做人一世」,若瞭解此句話的道理,會當用服務人群,造福大眾的心思來搶出頭天,「搶出頭天」就是好事。
若是為著家己的官位、權勢合財富,拚命搶出頭天,焉爾的「搶出頭天」就是黴事。
(作者是台語文字工作者)
註:
(1)猴猻仔(kau5-san1-a2):猴
子。
(2)驚一下半小死:嚇得半死。
(3)開正透早(k h u i 1 - c h i a N 1 -
thau3-cha2):大年初一大早。
(4)黴事(bai2-su7):壞事。