桐花樹下
■ 陳寧貴
陳總統息把講著廢統，
就引起各方有心人士，
大聲細聲亂糝唱衰，
講麼介係頑固堅持台獨立場，
又黑白不分惡意批評，
講麼介係改變現狀麻煩製造者。
請問：
台灣介前途係麼儕來決定？
台灣人民盼望介新路，
愛靠麼儕來煞猛開通？
每個國家有自家利益，
台灣人民介利益，
毋係伸手同別儕就能討著，
定著愛靠恩台灣人民，
共心協力打拚爭取正能結出甜果。
台灣既經行到命運十字路，
台灣人民愛擦亮目珠，
堅定弓狠自家意志，
愐清楚到底愛毋愛，
跈等初一十五無共樣，
盡像月光介馬主席，
行過急統奈何橋？
恁樣正毋會瞻天望日，
跌破自家頭膝！
將來毋論對岸利用政經，
仰般處心積慮拗蠻打壓，
乜毋管未來路途仰般艱辛，
為了後代子子孫孫介幸福，
我等定著愛集合台灣人民介意志，
毋半息打折妥協，
硬頸決心，永永遠遠，
做有自由有尊嚴介台灣人！
註
息把：稍微
麼儕：誰
煞猛：努力
恩：我們
弓狠：繃緊
愐：想
跈：跟
恁樣正毋會：這樣才不會
仰般：如何
（作者為客家詩人）
編輯精選
自由評論網粉絲團