◎ 鄭兆祥
有一種人，風度䆀、氣質差、角度無明，干但會曉死諍，呣捌戲文，綴人大氣捎咧歕。諍輸諍贏是一回事，公理正義煞予伊掞掞掉，世間敢益有公道？人講：「呣捌字兼無衛生，愛哭佫愛綴路」。
綴人的尻川後硞硞死饡兼剾洗，其實是卸世卸眾，落氣步盡展，予外國人看笑科。鳥鼠尾揤無膿，豬頭皮共款饡無油啦！
呣過，捌字敢就較高級、較有智識？敢就愛當眾人面「指教」囡仔，失人的面子、傷人的自尊？
有偌濟人是讀冊屆■（上敖下力），四書五經讀透透，呣捌黿鼇龜鱉竈？千萬呣通愈讀愈慼，佫較呣通讀冊讀佇尻脊骿，公學讀六冬，呣捌一箍屎桶仔枋。歷史上出賣朝廷，傷害國家人民的，敢呣攏是冊讀愈濟愈有權，科舉出身做大官的進士、讀冊人？冊讀愈懸，痞代愈■做，做愈濟，害死愈濟人。
宋朝宰相趙普是宋太祖上信任的大臣，《論語》讀真熟，伊講：「《論語》一半可用來助君打天下，一半可用來助君治天下。」（後來講作「半部《論語》治天下」）。就是伊編造「金匱之盟」假文書，解決宋太宗佇「燭影斧聲」中登基的合法性問題，出賣過身去的宋太祖。咱今也看「九二共識」呰个假議題，偷作手創空的過程是呣是手路誠成？是呣是冊讀真濟的人則做會出來的計謀？
註：死饡，tsuann，強辯、胡說八道。笑科，tshio-khue，笑詼、笑話。揤，tsik，擠壓。
（作者為台語教師）
編輯精選
自由評論網粉絲團