◎ 鄭兆祥
二戰終戰了後，蔣介石奉令軍事接管臺灣。尾後，一九四九年國民黨扑輸和共產黨的內戰，走路、流亡來臺灣，失去「固有疆土」的中華民國其實就算是滅矣！連老蔣家己嘛按爾講過。所以「中華民國佇臺灣」是一個騙局、一個無存在的假議題，連魔神仔都呣是！In欺騙臺灣人六十外冬，佔臺灣的土地，今也佫欲用另外一個「九二共識」的假議題來出賣臺灣，送肉飼虎。
聯合版報紙記者佇北京發一條新聞講：「社科院昨天在北京宣布，全套共卅六冊『中華民國史』出版發行。
套書主編金以林在接受記者採訪時指出，大陸重新看待民國史，具有重要意義，『中華民國史已成為兩岸共同歷史記憶』，大陸跨出這一小步，代表兩岸跨出重大一步。」
發新聞的人佮藍軍敢若誠歡喜，兩岸若像是一家伙仔親，得欲和好矣！真正是「四枝釘仔釘落益呣知哭」，七月半鴨仔呣知死活！「中華民國史」就是中華民國的死亡證明書，偆「歷史記憶」爾爾！
中國共產黨得著政權，嘛挈著歷史的解說權。讀歷史的人攏知，前朝的歷史是由後一朝的人來寫，寫好寫■ （左禾右黑）是歷史學家的良心問題。亦就是講，滅前朝的人則有權寫前朝的歷史。按爾就是證明，「中華人民共和國」已經消滅「中華民國」矣，恁是咧歡喜啥？
無存在的中華民國益咧慶祝「建國一百年」，敢呣是精神錯亂？臺灣人佫欲予騙偌久？
（作者為臺語教師）
編輯精選
自由評論網粉絲團