陳寧貴
一場三合一選舉，
藍綠摩拳擦掌分兩片，
汝抹我黑，我抹汝黑，
比賽看麼儕較毋驚黑，
台灣民主選舉混戰，
就恁樣激烈展開！
結果綠軍敗選，
支持者傷心到想切腹，
仰會輸到恁淒慘?
盡多台灣人暗中傳說：
本土政權淨會嘴講和解共生，
並無認真執行本土化承諾，
甚至打壓深綠愛台人士，
本土意識既經化作雲煙咧！
故所分人又滑稽批評：
佢綠色越來越淺，
有息把變成淺藍現象，
選舉時喊正名制憲吸收選票，
選後反倒講做毋到，
昨晡日講千般，
今晡日係一般，
牛皮緊吹緊歕，
人民期待漸落空，
這擺泛綠選民含等目汁投票，
心中艱苦阿扁總統敢知？
選舉總係有輸有贏，
無那介政黨做得永遠贏，
乜無那介政黨做得永遠輸，
政黨定著接受人民嚴格檢驗，
那個政黨能夠真心真意，
了解台灣人民佇愐麼介，
永遠同台灣人民企共下，
正有資格佇台灣做執政者！
註
兩片：兩邊
麼儕：誰
仰會：怎會
淨會：祇會
故所分人：因此被人
做得：可以
佇愐麼介：在期盼什麼
（作者為客家詩人）
編輯精選
自由評論網粉絲團