◎ 鄭兆祥
雙骹踏雙船的愛人仔，掩掩揜揜會當am-kham偌久？代誌煏空則來tshuē理由，牽拖規厝間，驚去是屎桶愈撓愈臭，mai佇遐屎礐仔蟲假清！根本就是捾籃仔假燒金，假影欲去廟裡拜拜，實際上是瞞夫騙婿，呰爿穿草鞋，迄爿結鞋帶，走出去佮人私通。
看一个人有老實否真簡單，聽伊雄雄講出來的就是真話！外來政權的統治者操弄族群，便若選舉就落台語、客語騙選票，講咱「挵死（攏是）台灣人」。一句講都袂曉話，也想卜刣佛拜雞？犯勢伊的心裡真正是欲共台灣挵挵予死則甘願？
三講四呣著的迄个人，台灣人真懷疑伊的母語到底是啥物？原來挈綠卡的人，伊的母語是已經變做英語矣，西洋的媒體訪問，無落英語袂爽！若按爾，啥人講伊是「失言」？共款講母語的西洋記者敢會聽呣著？雄雄用母語講出來的就是伊的心裡話啦！
一个政治人物，上重要的就是清白，敢通身分講袂清、私通敵對國家？痞厝邊一日到暗揭刀弄劍舞拳頭，數想人的財產，佫假笑面講恁兜就是阮兜，講咱是共一家伙仔。呣知死的猶戇想講有錢通趁就好，哪知汝想人的利，人想汝的母，佫是金雞母。見小利，失大事，貪伊一斗米，失去半年糧。終其尾，家賄去了了，欲哭無目屎！
心肝掠予在，管汰伊講啥，選票頓落去就著，四枝釘仔釘落去則知輸贏！台灣人，加油，衝衝衝！衝予倒！規氣呰每選舉，五枝釘仔攏總共釘落去！
註：掩掩揜揜，ng-ng-iap-iap，遮遮掩掩。煏空，piak-khang，事跡敗露，東窗事發。
（作者為台語教師）
編輯精選
自由評論網粉絲團