◎ 鄭兆祥
語言是活的，傳達思想；文字是語言的載體，記錄語言。民間文學中間上會當保留祖先的智慧的就是俗語佮諺語。俗諺語所反映的是生活的經驗、社會的現象和價值觀，佫較是祖先生活智慧的累積。
民間文學的特色之一就是變異性，伊會因人、因事、因時、因地來演化、調整佮適應，逮講話的主題或者是講話的人的心情來改變。可比講：「醫生驚治嗽，總舖驚食晝，塗水司驚掠漏」，到現代生出「賓館驚掠猴」鬥做「四句聯」。我的學生囡仔雄雄puh一句「學生驚罰抄」，押韻兼鬥句，真正是「倯佫有力佫兼袂跳針」，這就是民間文學的活力佮性命力。
親像「第一戇……，第二戇……，第三戇……。」的句式，就是看講話的人想欲傳達的訊息重點是啥物，自然會變化排列的順序，其中猶會有倒彄的成分、地方的特色佮社會背景的表現等等。日本時代留落來的「第一戇，食薰歕風；第二戇，撞球相碰；第三戇，插甘蔗予會社磅。」變作「第一戇，替人選舉運動；第二戇，種甘蔗予會社磅；第三戇，食薰歕風。」無一定有一工會變作「第一戇，選總統，……」
論真講，今也台灣犯勢偆一个「戇人」，總統都予伊選椆做兩冬外去矣！全台灣tshuē無佫較戇的人囉！戇面假福相，逐工食狂狂，激戇戇。食予肥肥，激予槌槌，妝予媠媠，等領薪水。戇人講戇話，戇徦袂扒癢，實在就是精神皮，戇餡。
按爾，到時「第一戇，選做總統」若成做台灣流傳的俗諺語，人民真正是欲哭無目屎！
註：tshuē，找。
（作者為台語教師）
編輯精選
自由評論網粉絲團