█ 陳寧貴
中資化身外資,
侵入台灣股市,
炒作台灣股價。
侵入台灣媒體,
炒作台灣新聞。
媒體變成布袋戲偶仔,
中資係該隻,
操縱布袋戲偶仔看毋到介,
又黑又怪撩嬈台灣介手!
愛看鬧熱介台灣人,
分佢獨家內幕劇情,
刺激到眼花撩亂腦充頂,
輒常分佢迷到盡像大憨牯,
憨憨跈佢笑跈佢喊!
斷真係人喊毋行,
鬼仔牽到弄弄行!
三介錢賺來,
分人兩介錢賣去!
每暗晡叩應節目開鑼,
這係滑稽介撮把戲,
節目搖身一變成法院,
主持人扮鐵面無私包公,
來賓扮爆料福爾摩斯,
一場又一場續落去,
暗夜大審台灣介戲:
包公、福爾摩斯,
大戰無影無跡介深喉嚨,
就恁樣驚天動地開始咧!
混雜身分可疑介觀眾,
適四面八方叩應入來,
裡應外合織成交叉火網,
任何畀攻擊介目標,
燃時千瘡百孔應聲橫下!
橫下介骨牌效應,
到裡尾該衰介係麼儕?
記得!記得!台灣全住民都愛承擔!
註
撩嬈:戲弄
輒常:經常
恁樣:如此
畀:被它
燃時:立即
橫下:倒下
到裡尾:最後
麼儕:誰(作者為客家詩人)
編輯精選