■ 李勤岸
咱台灣ê閱聽大眾已經變做飼料雞；咱ê媒體已經變做歐羅肥飼料公司；SNG採訪車就是歐羅肥輸送帶。咱若無發起運動來kã媒體制裁，台灣人連鞭就會hó人用飼料飼kah變做超重ê肉雞，肥tsut-tsut ê肉雞。
媒體工作者逐不時 （tāk-put-sî，時常）都講in ê工作是beh維護閱聽大眾「知ê權利」。到底大眾需要知影到甚麼程度？大眾kám 無「m̄知ê權利」？
王建民ê棒球成就當然使咱台灣人感覺非常驕傲，所以咱真ài看伊tī球場ê表現；但是咱kám有需要知影伊ê私生活？伊是m̄是細漢就hō人io（養）咱kám需要知？建仔真受氣，發表聲明講暫時無beh接受台灣媒體ê採訪。著（tióh，對！）伊有m̄ hó人知ê權利。伊ê個人隱私權受侵犯，伊當然受氣。
陳幸妤雖然是總統ê查某囝，雖然伊ê翁婿舞真大條，但是伊beh搬去叨位 （tó-ûi，哪裡），盈暗（ing-àm，今晚）beh睏叨位大眾kám有需要知？陳幸妤真受氣kã跟tòe（跟隨）ê記者講：「有點人權好不好？」著！伊有m̄ hó人知ê權利，這是人身自由ê基本人權ah！陳幸妤絕對有權利受氣，伊連最起碼ê人權都hō媒體侵犯，是按怎bê使（bê-sái，不可）受氣？
當然mā有人真ài上媒體，無管報伊啥物攏好，若久無kãā報，伊tióh真鬱卒，緊tshûe（找）tsit-má上流行ê新聞來插一腳，紅目û仔鬥鬧熱，伊無管按呢做著m̄著，對伊家己好m̄好，橫直上媒體就爽。這種人就是「暴露狂」。In有暴露狂，媒體mã有暴露狂，但是咱閱聽大眾mã有m̄看ê權利、m̄知ê權利、m̄做飼料雞ê權利！（作者為詩人、世界台灣母語聯盟總召集人；用聽ê請上網︰http：//khinhuaⁿ.taibun.tw/）
不用抽 不用搶 現在用APP看新聞 保證天天中獎 點我下載APP 按我看活動辦法
《自由共和國》來稿請附：真實姓名、身分證字號、職業、通訊地址及戶籍地址（包括區里鄰）、夜間聯絡電話、銀行帳號（註明分行行名）及E-mail帳號。
刊出後次月，稿費將直接匯入作者銀行帳戶，並以E-mail通知。
文長1200字以內為宜，本報有刪改權，不願刪改者請註明；請自留底稿，不退稿；若不用，恕不另行通知；請勿一稿多投。
《自由共和國》所刊文章、漫畫，將於 「自由電子報」選用，不另外奉酬。
Email：republic@libertytimes.com.tw