■ 普拉雷．阿炎
兩年外前，王永慶beh起一棟三億ê五層樓送予中央研究院台灣史研究所使用，想袂到今年四月李遠哲院長發表二氧化碳愛減量ê呼籲了後，佇前幾日王永慶續來反悔。伊ê理由是「有意義才beh捐」。咱攏知，台塑ê產業差不多攏是二氧化碳排放量非常大ê生產事業。所以李院長ê話伊聽著袂爽。台研所ê大樓就按呢無去lah。
人講「生理人無祖國」。其實呣但按呢。懸（高）污染生產事業ê財團大部份攏是無人類、無地球--ê。只要恁爸有錢趁，管待伊（管他）死外濟人，大自然變kah爛kô -kô kap我無tī-tāi（沒關係）。
日本人佇台灣ê時，in（他們）佇大都市攏有保留一塊真完整ê樹林地。譬如講，高雄市佇目前科工館ê所在，東旁對大順路西旁到民族路，原本是一片原始樹林。日本人認為兩百年後ê高雄市ê人口需要這大片樹木來淨化空氣。咱愛知，一叢大叢樹若親像一台五噸ê冷氣機會得通淨化空氣kap予咱感覺涼爽。呣閣予某一個市長將地賣了了。賣kah剩一個六號公園，就是chit-má ê科工館。一條通愛河ê溪水「寶珠溝」也蓋蓋（加蓋），變成作「覺民路」。
（作者為西拉雅族、台灣羅馬字協會監事）
編輯精選
自由評論網粉絲團