■李勤岸

你若對中國古代e「抄家滅族」、「株連九族」、「滿門抄斬」無法度理解一為何厝裡有人犯罪， 煞tioh規家伙仔thai（殺）了了， 連親tsia. （親戚）朋友都掃掃著？請看現此時台灣當teh演出e北京劇「駙馬爺」，咱就一清二楚。

咱那親像坐「回到未來」e時間機器，21世紀e現代台灣，忽然間變轉去古中國e北京城。咱ti媒體看著e字眼攏是「駙馬爺」、「皇帝娘」、「清君側」、「左右護法」、「包青天斬陳世美」…。時空有夠錯亂。這就是製造戲劇氣氛ah。到時，真正「抄家滅族」e時，看戲e觀眾一定感覺自然而然，甚至感覺理所當然，因為氣氛tioh是teh演北京戲mah。總統in囝婿準講若犯罪，kap總統府副秘書長，抑是國安會諮詢委員有甚麼ti-tai（關係）？為甚麼in二個人ai落台？媒體kap反對黨koh開始點名第二波落台e名單：財政部長、交通部長、外交部長、教育部長…。規牛車。無列名e部會首長真罕（han，稀少）。其中教育部長杜正勝應該落台e理由是：「爭議性太大」。

請繼續往下閱讀...

甚麼是爭議性？就是講有e人講伊好，有e人講伊bai（不好）。甚麼人無爭議性？就是孔子公上kai無認同e「鄉愿」lah無是非！無骨氣、無理想性、見人講人話，見鬼講鬼話e hit款人lah。孔子公講甚麼人是好人？就是好人講伊好，歹人講伊bai e hit款人。換咱tsit-ma（現在）e話來講，就是有爭議性e人。若是杜正勝這款人，孔子公會ka o-lo （讚美）。Ta咱m是攏轉去teh演中國e古裝戲ah， 孔子公e話kam會使（e-sai，可以）無聽？

（作者為詩人、世界台灣母語聯盟總召集人，用聽e請上網http://khinhuann.taibun.tw/）

不用抽 不用搶 現在用APP看新聞 保證天天中獎　 點我下載APP　 按我看活動辦法