◎ 鄭兆祥
台灣有誠濟世界一的好名聲,嘿是逐家骹踏實地扑拚得來的。呣過,今也煞去予帶屎的衰尾道人主政者,變徦予人看衰,衰徦種匏仔會生菜瓜。往過「自我感覺良好」的「馬英九們」,可能嘛感覺家己「衰徦呸喙瀾予雞食,雞都會毒死。」
種花,本成是咱台灣上有名,全世界攏知的產業,會使講是「名聲迵四海,世界通人知。」呰款優勢來辦「花卉博覽會」,屆好!結局竟然是,猶未開始就已經「霧裡看花」,眾人看徦花滒滒兼霧嗄嗄!
愛台灣,無代表就愛接受貪污無能的政府烏白舞!買物件有行情價,較戇的嘛知愛比價數,哪有「簡單」徦由在人喝價?主事、經辦的攏是國家的公務員,經過考試、訓練出身的,敢真正赫戇,戇徦頭殼破一空?
我看是「做官騙厝裡,做生理騙熟似」啦!水清,無大魚;做官若清廉,食飯就攪鹽!茲的做官的大官虎,平常時仔穿西裝結ne-kut-tai,呣過講話無實在。會騙就騙、會拗就拗,對百姓激面腔,對頂司扶扶挺挺。欲做頂司狗,呣做下司官,骹踏馬屎,傍官勢。真正是甘願做狗,免驚去無飯通食!
外來的殖民政權,做官的誠gau見風駛帆,in基本的心態就是「三年官,兩年滿」。馬政府的官員犯勢已經看呣是範,早慢愛倒,規氣緊出手大嘮,囥寡仔佇橐袋仔底準備走路。台灣民主國遐的大粒頭的,敢無講愛台灣?敢呣是白銀袋咧走第一?
註:變徦,pinn ka。毒死,thāu--si。扶扶挺挺,phoo-phoo-thann-thann,奉承、巴結。
(作者為台語教師)