◎ 鄭兆祥
誠久無去戲園看電影，今仔日我煞有一个衝動，想欲去看拄出的新片。迄个「あの啥物碗糕」經濟舞袂好，佫出來客串搬電影，參一陣大粒頭的演員，刀光劍影兼銃子炸彈亂亂飛，刣徦pìn-piàng叫。
臺灣真正有國際水準，選个總統較贏美國的州長，一日到暗咧搬戲。人講「愛嬈，就去豬哥寮」，欲做官，先做戲，阿九先生做戲興過做總統，共選民當做伊的冬粉（粉絲）。人生可比一齣戲，戲若搬完好轉去，呣知迄个選舉時講伊準備好矣的腳數，敢知家己的戲齣該當愛結束矣？
做戲悾，看戲戇，好戲佇戲尾，主角若死，戲就煞。偏偏有的痞戲拖棚無欲煞，戲無夠，仙來鬥，出一寡仔笑科戲烏白舞，結局就是「老戲跋落戲棚骹」，顧人怨佫眾人漩。
今變無步，偆哭調仔好搬。英臺哭兄，孟姜女哭倒萬里長城，哭徦烏天暗地，目屎滴落胸前掰袂離。犯勢知影家己已經是「票房毒藥」，「阿扁也」都原也予關起來真久矣，規氣攏推推予前朝，「千錯萬錯攏是in對不起臺灣，和我無關係！」臺灣人敢真正赫好拐？
人民相信做戲仔講的話，算來兩冬過頭去矣！當初時指天指地講徦胡蛻蛻，今也怨天怨地推徦離離離。袂生，牽拖厝邊，卜死，牽拖鬼掠。袂曉駛船嫌溪狹，袂曉泅，牽拖lān脬重家己想啦！
註：銃子，tshìng-tsí，子彈。腳數，kioh-siàu，角色。笑科，tshiò-khue，笑詼，笑話、笑料。今，tann。
（作者為臺語教師 ）
編輯精選
自由評論網粉絲團