■陳寧貴
偉大介藍綠立委，
嘴講藍海策略，
一到國會戰場，
就變做紅海策略。
跆拳道堵著鎮暴盾牌，
用大腳板問政，
拿拳頭講道理，
著迷彩裝共樣會掛彩，
傷口縫九針乜會變百針，
其實著毋著傷無要緊，
做得打出自家天下正重要，
難怪NCC笑翻CNN，
斷真台灣有出名，
國會興風作浪翻雲覆雨，
全世界傳名聲！
現下台灣怪現象，
不問蒼生問鬼神，
不問是非問立場，
雙方都係台灣人，
有麼介深仇大恨，
需要恁樣背水一戰，
混戰到毋記得台灣前途，
看毋著受苦受難台灣人民。
對岸想盡辦法用硬用軟，
打壓台灣生存空間，
我等介大立委，
乜係想盡辦法用硬用軟，
打壓對方介生存空間，
淨賸2008選舉輸贏目標。
恁樣專長焦土零合鬥爭，
台灣國會有麼介用？
台灣仰毋會向下沉淪？
天佑台灣，
寒露過三朝，早慢共下飆，
台灣人民愛遽遽企出來，
消滅台灣妖魔鬼怪，
再現清明活力新台灣！
【註】
藍海策略：充滿創意開
啟新局之道
堵著：遇到
乜著：乜mei，也會
著毋著：對不對
仰毋會：怎麼不會
寒露過三朝，早慢共下
飆：寒露一過秧苗飆長
（作者為客家詩人）
編輯精選
自由評論網粉絲團