■陳寧貴
台灣有息把人，
佢兜專門唱衰台灣，
唱燥嘴，飲台灣水，
止渴後，繼續唱，
唱肚飢，食台灣飯，
食飽，再過唱！
我兜想要同佢兜和解，
盡像畫水畫魚空作浪，
繡花繡草無鼻香，
佢兜就係毋想和解。
勸佢兜莫過唱咧，
續緊唱緊大聲，
恁樣介人愛仰般同佢共生？
佢兜佇台灣船項煞猛打窿，
有一日入大水，
逐儕都囥無奈去也！
台灣係阿姆，
唱衰阿姆係麼介台灣人？
原來佢兜心底肚，
無台灣這個阿姆，
難怪邀佢兜和解共生，
結果瞻天望日，
跌破頭膝！
和解！和解！
愛同台灣和平。
共生！共生！
愛同台灣共心。
2`註：
有息把人：有一些人
佢兜：他們
無鼻香：鼻，聞。喻無效
恁樣：這樣
仰般：如何
（作者為客家詩人）
編輯精選
自由評論網粉絲團