■林沈默
一炷香、透三清，
新年兜、來反省，
祈求聖壽無疆眾神明，
天靈靈啊地靈靈…
第一祈願國際和平：
風雨順、無事情，
免冤家、免戰爭，
天災瘟疫烏雲散無形，
利益衝突，會議室開房間，
嘴舌溝通、毋免買槍，
軍火工場倒到無半間。
國對國、和氣開太平，
台海地界無風無湧，
台灣中國、一人顧一邊。
第二祈願朝野理性：
有競爭、無鬥爭，
藍綠黨、相尊敬，
執政黨拚經濟顧民生，
國家主權，心頭意志堅定，
在野黨反對毋通反形，
毋通勾結外鬼做內應。
手牽手、要同船共心，
本土意識排咧頭前，
台灣釘根、才有好光景。
第三祈願社會安定：
百行業，萬事興，
田庄伯，好收成，
勞動兄弟輕鬆飼家庭，
生理頭家，賺錢滿厝間，
老大人健保卡毋免用，
讀冊囡仔快樂閣聰明。
騙仙仔、強盜攏絕種，
辛苦病疼、憂鬱症，
一切一切、攏總袂發生。
註年兜（台音ㄉㄠ）祈願，年終祈禱。炷，唸「‧ㄊㄧㄠ」。三清，玉清、太清、上清為天界仙境。一邊（ㄅㄧㄥˊ），或為「爿」字。
毋（m）通反形，不要變款。同船，同字唸「ㄉㄤ」。
袂（‧ㄇㄧㄝ）發生，不會發生。
（作者為本土詩人，專事「台灣唸謠」創作）
編輯精選
自由評論網粉絲團