◎ 鄭兆祥
東京都知事石原慎太郎講的話,真直接,呣過,敢有呣著?是反對者借機會發揮啦!刣魚愛刣到鰓,講話愛講透機,咱來看原文:
石原……回答記者的問題說:「我們正好可以利用這次的大海嘯,洗清我們的私慾和長年累月積在日本人心中的污垢,我覺得這是天譴。」「這是提醒日本人必須反省。」(自由時報2011-3-16 焦點新聞)
石原是作家、畫家,日本的右翼保守政治家,主張反對中國民族主義佮美國帝國主義。看代誌的角度有誠深的自我反省,我感覺伊無呣著,顛倒是代表日本人的良心!
「菩薩坐在蓮花台上」是啥意思?外來政權愛「落」台語來騙選票,偏偏「一句講都袂曉話」,則會講日本的放射性物質(輻射塵),「生吃都不夠」,袂飄來台灣。
會使講「土地公呣驚風颱——老神在在」,是按怎無欲用、嘛袂使用「菩薩」來譬喻?因為神格無同、角色嘛無同。「無通生食,哪有通曝乾」是講時機bai,物資無夠,無通偆。看字面的意思烏白講,無瞭解台灣的語言佮文化,講呣著話益無願意會失禮,憨慢假高尚,外行人講裡行話。文化深層的物件,殖民政權的政客,呣捌就憺憺mai講,較袂落氣!日本政治家,台灣政客,精差就看現現;無毛雞假大骼,笑破人的喙!(作者為台語教師)