自由評論網粉絲團
◎ 陳金順
台灣文學相關的事工，在來干焦小眾咧致重。這回，張良澤教授受委屈事件，引起眾人注目，煞尾官廳出來挲圓做公親。
張良澤事件，雖罔暫且到一個坎站。不而過，張教授下願成立「台灣文學國家園區」，這個向望需要社會各界紲勢關顧。
筆者參張教授無私交。二十外冬來，恬恬仔觀看伊綿爛拍拚，規心為台灣文學咧走傱，這款精神世間罕有。
張良澤是台灣文學研究者、教育者、編輯者。窮實，伊嘛不止仔敖寫小說，作品展現其他作家僫得有的個人色彩。
早前，伊主編《台灣文學評論》。這份刊物，毋但大碗滿墘，內容包含「論述」、「隨筆」、「小說」、「台灣詩頁」、「回響」、「編者手記」等。尚且腹腸嶄然仔闊，前後刊登筆者兩篇台文書寫的學術論文，字數超過三萬。
這陣，伊八十外歲，猶咧主編《老人文學》。佇台灣文學史上，毋捌看過遮爾頂真的戇人。筆者相信，這份老人編的文學雜誌，佇水準頂懸，的確袂失讀者的禮。
「台灣文學國家園區」本底該當由官廳主動規劃，咱嘛期待文化部和教育部會當加撥寡經費來推動。若準未來無法度照咱所願，毋免失志，肩胛楗相倚，逐家鬥陣出錢出力共張教授贊聲，眾人號齊事會成！
（作者是台語文學作家）
