TOP

無學 未曉讀寫母語

2006-04-06 06:00

■ 張復聚(高雄醫學大學台語文教師)
鄭詩宗(高雄醫學大學台語文教師)
柯巧俐(高雄醫學大學台語文教師)
李勤岸(夏威夷大學語言學博士)
張學謙(夏威夷大學語言學博士)
蔣為文(Texas大學語言學博士)

李慶安立委質疑教育部長母語教材ê問題,hou咱看著伊對語言教學ê無知及拗蠻!代先,母語能力本來就是干單包含會曉講及會曉聽若定;若無學過,就未曉讀、嘛未曉寫,koh卡無可能會曉教別人!這是基本常識。咱早前無母語教育,到即馬台灣ê家長有幾ê人學過母語讀寫?相信足少、足少。媽媽若beh會曉教母語讀寫,需要先去補習!請問李委員:妳出世m免學就會曉讀、寫中文?

Koh有「鄉土語教學罕見字羅馬拼音」(聯合報),這是足奇怪ê講法,羅馬拼音就是咱大家lóng知ê英文字母abc,有甚物罕見?顛倒是堅持全部課文lóng beh用漢字才會出現罕見ê古怪漢字;若是歸氣lóng用羅馬拼音就無即款問題!這是因為台語內面有真濟m是漢語,像台語講麻殺目(moa-sat-bak)是「虱目魚」、奧蟯(o-gio)是「愛玉」、殺文(jabon)是「肥皂」、拔仔(lapat)是「番石榴」、阿西(assey)是「戇頭」、荖仔(rauwa)是「騙子」、tâm是「潮溼」等等,漢字無可能tàu-tah(鬥搭,貼切)表達,所以古怪ê漢字就出現lah。另外,「立委郭素春自認台語不錯」,「自認不錯」事實無一定是「不錯」;「自認不錯」就會當教冊?按呢咱國家逐年開足濟錢teh經營ê師範教育會當免koh辦lah!

美國ê教育是咱大家足欣羨ê,照講美國人讀寫母語應該無甚物問題;事實leh?未曉讀寫母語ê人一大堆!幾年前報紙有報導美國副總統高爾(Al Gore)連土豆ê英文peanut嘛寫m著!這koh卡顯示台灣母語教育定著需要包含讀寫ê必要性及迫切性。

目前母語教育上大ê問題是教學順序:若是一開始就先教10禮拜ê羅馬拼音,koh來就簡單lah。咱早前佇學校嘛是先學10禮拜êㄅㄆㄇ就會曉用注音符號造句甚至寫簡單ê文章;為啥物母語教育無beh按呢做?